| |||
|
. Господи, Иисусе Христе, Сыне Божий, Ты бо рекл еси пречистыми усты Твоими: «Аминь, глаголю вам, яко аще два от вас совещаета на земли о всякой вещи, еяже аще просита, будет има от Отца Моего, Иже на небесех. Идеже бо еста два и трие собрании во Имя Мое, ту есмь посреде их». Непреложны словеса Твоя, Господи, милосердие Твое безприкладно и человеколюбию Твоему несть конца. Сего ради молим Тя: даруй нам, рабом Твоим, всем православным Христианом, согла¬сившимся просити Тя о скорби нашей за страждущую страну нашу Российскую и чада Церкви Православныя. Боже, великий и дивный, каяйся о злобах человеческих, возводяй низверженныя и утверждаяй ниспадающия, призри милостивным Ти оком на Отечество наше Российское и народ наш, и сокруши благодатию Твоею жертву беззаконную, на земли Российстей бесовом приносимую и избави нас от насильства безбожник и богопротивнаго ига сатанинскаго, от еретик осквернения и нечестивых инородцев и супостатов попрания. Да сокрушатся и разорятся (во граде нашем Владимире) все престолы в вертепы сатанистов и чернокнижников, колдунов и обаятелей, магов и гадателей, содомитов и деторастлителей, осквернителей и совратителей, соблазнителей и растли¬телей народа нашего. Яко исчезает дым, да исчезнут; яко тает воск от лица огня, тако да погибнут беси и вся нечисть и мер¬зость сатанинская от лица Святой Руси и народа Божия. Ей, Владыко наш Господи, рекий учеником Твоим: «Азъ есмь с вами во вся дни, до скончания века», - не остави нас во гресех наших погибнути (здесь можно назвать свои имена), но ослаби, остави, очисти и прости беззакония наша. Покрый благодатным покровом Твоим Отечество наше Российское, (град наш Владимир) и народ наш, и защити нас от коварства и лукавства супостатов, запрети наглой нечисти, пожени их бурею Твоею и гневом Твоим смути их, блесни молния и разжени я, исполни лица их бесчестия, да постыдятся и смятутся в век века, да посрамятся, и силою судеб Твоих гордость их да сокрушится, Имя же Твое Святое да прославится в нас, недо¬стойных, и во Отечествии нашем Российстем и во всех людех Господи Боже, Спасителю наш, сердцем сокрушенным к Тебе припадая, просим Тя: обольщенныя обрати и на путь правый настави, малодушныя укрепи, маловерныя просвети и духом Твоея ревности воспламени, да не погибнем от сетей вражеских. Сего ради к Тебе прибегаем, яко Ты еси Бог наш и разве Тебе инаго не вемы. Припадая, стеняще, вопием Ти, Боже наш, о исполнении сего прошения нашего. Но обаче не якоже мы хотим, но якоже Ты. Да будет воля Твоя во веки. Аминь. . |
